101 Jahre Jodlerklub Olten

 

Johresbrecht 2018

 

Liebi Awäsendi

 

Mer chöi höt secher ganz stouz zrogg luege of össerscht glongni, tolli, erlebnisrichi und gsöuigi Jubiläumsaktivitäte. Mer hei i öisere urbane Region Hunderti vo Lüt chönne begeischtere und secher i vöoune s’Bruchtum Jodle s’erscht Mou so rechtig noch brocht.

Der grossi Ufwand het sech auso vou glohnt s’Motto «chömet verbi zom gsöuige zämesi» hei Zähni sooo erschnt gnoh, dass si höt no derbi si ond höt do i öisi Reihe ufgnoh werde. Suuuper!

Wöu’s so schön gsi esch, wei mer s’Jubiläumsjohr jetz no schnäu der Reie no Revue passiere:

·       Am 28. Mai si aui Aktive schön gschtreglet on ir Tracht zom Fotoschooting zom Burehus Gäumann cho. Wo de Jodlerinne aues schön böschelet, d’Jodler d’Bröue grechtet ond d’Hüet schön vörezoge gha hei, hets chönne losgoh. «Vöreluege, lächle d’chees» ond scho si die herrliche Föteli gmacht gsi. Nome eim het si Föteli ned passt, gäu Ernst Bühler, ond so besch du de ir zwöite Rondi paar Woche spöter nomou änegstande!                                 

·       Am 14. Juli 2018 esch es zom n’e erschte Höhepunkt cho. Ösi Jubiläums-schrift «100 Johr Jodlerklub Olten» esch drockfertig vorgläge. E wett’s ned onderloh, im Verfasser, René Künemann, höt jetz do nomou ganz härzlech danke säge för das tolle Werk. Schön chöi mer De höt grad ou i öisi Reihe ufnäh. Du könnsch d’Gschecht vom Jodlerklub – obwohl erscht derbi – ohni Zwiifel scho am Beschte.

·       Am 28. Augschte 2018 hei mer e witere Meilestei gschafft: Der Jodlerklub Olten präsentiert sech jetz ou onder www. Jodlerklub-Olten.ch. Der Otti Burri – wo scho d’Website vom Jodlerdoppelquartett Rothrist entwicklet het – het e tolli Plattform gschafftet, wo mer d’Jubiläumsaktivitäte beschtens hei chönne präsentiere. D’Lieder, wo mer während em Apéro hei chönne gniesse, si onder anderem vo öisere Website.

·       Und denne esch s’Feschtfieber langsam aber secher gstege. Mer hei am Fritig 2. November 2018 ab de Nüni am Morge der Mühlemattsaal igrechtet. Onderstötzt vom Huswart Remo ond einige ossestehende treue Häufer hei mer onder der Leitig vo öisem Ueli die tolli Halle igrechtet, dekoriert, tischet, aues schön beschreftet, farblich kennzeichnet, der Wirtschaftschef Beat het sogar no nöi Farb-Kombinatione erfonde. Ou Zuefahrtswäg si kennzeichnet worde. Öise Koch Markus het d’Kochi vorbereitet, der Beat aues a rächt platz gleit,  Plätz nomieriert ond  Getränk im Kühelwage gordnet. Ar Houptprob z’Obe het öis d’Ursula no die letschte Tipps gäh ond mer hei schöön gsonge, me cha säge, d’Vorbereitige si beschstens glonge. Gäu Beat ou Kaffifertig Gläser hei mer no «Kopf öber Fuess» zämeramisiert. Wo mer die de am Samsschtig öppe am Vieri z’obe inetreit hei, meint der Huswart Remo «hättet nom öppis müesse säge, di si haut im gschlossne Kaste gläge». 

·       Der Töröffner am Juiläumssamschtig vom 3. November 2018 esch öise Koch, der Markus gsi – ond das, obwohl er e schwäri Operation vor sech gha het. A dere Stöu liebe Markus merci vöu Mou. Är het der Steamer scho am Sechsi am Morge gstartet. So esch aues parat gsi, wo d’Hädöpfu Schäl- ond Schnid-Equipe d’Arbet um 8.30 ufgnoh het. Ou öisi Dirigentin esch im Isatz gstande. Chapeau, liebe Ursula. Am Zwöufi z’Mittag het sech de Kochequipe komplettiert ond d’Arbeit ufgnoh.  S’Maggie ond der Beat hei d’Getränk igrumet ond s’Personal instruiert, der Ruedi met sine Hälfer Tombola fertig ufgstöut ond aui Portemonnaies gröstet, der Ueli no die letschte Hewiestafeli abrocht ond der Prakdienst instruiert, der Peter Tischreservationen vorgnoh. D’Annemarie no Dekoration s’letschte Mou böschelet. Und de mini Liebe

o   Esch es los gange:

§  Am Apéro am Föifi ond am aschliessende Nachtässe hei mer öisne Sponsore ond Ehregäscht - insgesamt 70 Personen - för ehri Verdienscht ond ehres Engagement chönne danke säge. Öisi Jodlerinne – i de tolle Trachte – hei d’Gäscht verwöhnt.

§  Wo s’ech am Sechsi d’Haue scho langsam het afo föue hei mer Aktivi scho schööön igsonge. S’Ursula het gmeint, «wenn der e so singet, de werds glinge!!»

§  So hei mer de im vollbsetzte Saal s’Jodellied «Grüess Gott»met me glongne Huetgruess zor wördige Eröffnig sehr schön gsonge, ou aui ander Vorträg si beschtens glonge. Wörzige Asproche hei zor guete Stemmig bitreit  - öbrigens, d’Karin Niederber wartet de immer no of d’Selfie, ned vergässe - ond met em witzige, musikalisch hochstehende Engelchörli het sech.

§  die super Stemmig erscht gäge morge weder gleit.  Wie me met «Hüehnergegacker» ond passender Mimik e Hit cha lande, hei die Acht Engle us Appenzell beschtens bewese. S’Trio «Aregruess» us Boll het met ehre fätzige Musig dä tolli Obe lo usklinge.

·       Trotz töuwis weni Schlof si am Sonntig, 4. November weder aui parat gsi för e Jodlertreff. Wederum vor vöune, vöune Fans vom Jodelgsang hei die 6 Gascht-Jodlerklüb s’Beschte gäh ond för e herrliche Stemmig gsorgt. Mer vom Jodlerklub Olten si do natürlech ned hindeabgstande ond hei zwe tolli Uftritt botte. Ou d’Oergeli Groppe «Uf ond Zue» het för tolli Onderhautig gsorget. Der Uftritt vom Gsamtchor met de Lieder «E gschänkte Tag ond Bärg-Arve» met rond 150 Jodlerinnen ond Jodler esch secher s’Töpfli of em i gsi ond het – so het me mer’s gseit – bi vöune Zuhörer «Hühenerhut» usglöst. Der abschliessend Höhepunkt esch de secher d’Übergab vom Chäs ond de tolle Chästeller a die Aktive vom Jodlerklub Olten gsi. Es herrlechs Gschenk, wo öis Aktivi immer ond immer weder a öises Hunderjährige wird erinnere. E härzliche Dank a dere Stöu ou a öise Gastjodler Fritz, wo die  Gschenköbergab loschtig ond humorvou vorgnoh het. Merci liebe Fritz.  Wenn ou scho chli met müedi Bei, hei am Sonntigobe no einisch aue ghoufe wägrume, was so gäge die Achti de ou fertig gsi esch. Ond einige onder öis, - emu e - sogar fix ond fertig.

·       Nochem wägrume vo der Stossewerbig dore Ueli ond me, het am Mäntig scho fasch nüt me of de Alass higwese. Trotzdäm wird er secher i öiser Erinnerig blibe. Dank der DVD chöi mer die tolle Stonde jo immer öppe weder abrüefe ond Revü passiere lo.

·       E wett a dere Stöu no einisch aune Häuferinne ond Häufer ganz, ganz  härzlech för ehre Grossisatz danke säge. Ohni au dä Effort - vo de rond 100 Häuferinne ond Häufer, wär öises Jubiläum ned zom n’e Grosserfoug worde.  Merci vöu, vöu Mou.

o   Der Isatz vo de externe Häuferinne ond Häufer hei mer vor Ort met r’e chline Anerkennig gwördigt.

o   D’Ehrenmetgleder, d’Gast Jodlerin, d’Gastsänger ond aui Aktivi hei mer -  zäme mit Begleiterinne ond Begleiter – am 8. November 2018 zo der «Interne Jubiläumsfiir» z’Wangen i Chilesaal iglade.

§  Bim n’e feine Ässe, beschtens vorbereitet vo de Bärenzwicker, gsöuiger Onderhautig vom «Drü Generationen Chörli, bestehend us öisem Ehrenmetgled Margrith Roth, ehrer Tochter Madlein ond de beide Grosskinder Fabienne, Michelle ond de Bärenzwicker, ond de original bekleidete Schnoderwiibli vom Diemtigtal hei mer e tolle, wördige Abschloss vom Jubiläumsjohr gfiret.

o   D’Ehrenmetgleder, d’Gast Jodlerin, d’Gastsänger ond aui Aktivi hei mer -  zäme mit Begleiterinne ond Begleiter – am 8. November 2018 zo der «Interne Jubiläumsfiir» z’Wangen i Chilesaal iglade.

§  Bim n’e feine Ässe, beschtens vorbereitet vo de Bärenzwicker, gsöuiger Onderhautig vom «Drü Generationen Chörli, bestehend us öisem Ehrenmetgled Margrith Roth, ehrer Tochter Madlein ond de beide Grosskinder Fabienne, Michelle ond de Bärenzwicker, ond de original bekleidete Schnoderwiibli vom Diemtigtal hei mer e tolle, wördige Abschloss vom Jubiläumsjohr gfiret.

o   Abschliessend möchte i feshaute, das ou verbonde met mim persönliche ond härzliche Dank as s’ganze OK:

§  S’Hunderjährige vom JK Olten esch us jeder Secht attraktiv gsi:

·       Us Secht vo de Sponsore: se hei sech engagiert ond heis gnosse

·       Us Secht vo de Zuehörer: Se si sehr zahlrich erschene ond hei grosse Spass gha

 

 Es esch öis e gsondi Balance zwösche Neh ond Geh glonge

 Ond ……. mer hei derbi 10 nöie Metgleder gonne.

 

 Im Jubiläumsjohr hei mer 48 Probe ond 16 Uftrett oder Ständli gha. Näbscht de Uftrett im Zämehang mit de Jubiläumsaläss si secher die folgende Engagements vo bsonderer Bedütig gsi.

 o   d’Umrahmig vom Gottesdienst i der Oltner Martins-Chile ond em aschliessende Risottoässe

 o   d’Umrahmig vom Gottesdienst am Engelbergschwinget ond die verschedene Uftrett am Schwingfest säuber

 o   der Uftrett ar Oltner 1. Augustfiir met em nöi igstutierte Lied «Olten»

 o   d’Umrahmig vom Berggottesdienst of der Bornwiese z’Kappel

 o   Singe i der reformierte Chile z’Wange mit aschliessendem Apéro

 o   Ned vergässe möchte i ou ösi Uftrett i de Altersheim z’Läufelfingen, Weingarten ond Ruttiger

 

E danke aune für dä Isatz.

 

Es grosses Merci goht doderbi a öisi Gastjodlerin ond öisi Gastsänger.  Denn ohni öichi Onderstötzig wäre mer 2018 ned uftrettsfähig gsi. Dankeschön

 

E ganz spezielle Dank goht i däm Zämehang natürli ou a öisi Dirigentin. Liebi Ursula, Du hesch es weder einisch meh beschtens verstande die rechtige Lieder uszwähle ond öis e so izstöue, dass mer bi öisne verschedene Uftritt brilliert hei. Sinnböudlech gseh, hesch es Du verstande – öis wie n’e Uhr ufzieh – ond mer si de gloufe oder ebe hei gsunge ond gjodlet und hei aues gä. Ond s’esch glunge, hei mer doch wie Lerche gsunge.

 

Es fröit öis natürlich osserordentlich, dass Du ou im 2019 – im Johr vo der Integration vo öisne Nöie on em Johr vom Nordweschtschwizerische Jodlerfest z’Mümliswil öisi Dirigentin besch.  Suuuper!!

 

Danke wet e a dere Stöu ou mine Vorstandkolleginne ond –kollege för all ehres Schaffe ond die tolli Zämearbet. Mer hei insgesamt 6 Vorstandssitzige gha ond doderbi ou die ganze Jubiläumsaktivitäte abdeckt. Met em Maggie Buffat, em Beat Suter ond em Peter Bartlome hei mer der Vorstand temporär erwiteret. S’Maggie on der Beat hei Fäschtwertschaft mit Bravour organisiert ond der Peter der Vorverkauf beschtens gmänägt. Es bsonders Dankeschön ghört do öisre Gastjodlerin Maggie ond öisem Gastsänger Beat för das tolle Engagement im Vorstand.

 

Of Grond vo minere Initiative het sech der erwiteretei Vorstand alässlich vo der letschte Vortstandssitzig am 28.11.2019 – aus Dank für dä osserordentlichi Grossisatz es Nachtässe us der Klubkasse lo finanziere.  

 

S’Hundertjährige esch verbi, herrlech esch es gsi!

Döit ned nochelo, de duet ou d’Erfougsgschecht JK Olten witergoh.

 

Merci

 

 

Euer Präsident

Roland Rötheli

 

 

 

Wangen, 16.2.2018/rr